Хөгшин мод

Бүхэлдээ хөх туяанд умбасан зураг.
Ховор өнгө.
Голд нь нэг мод
Бүдүүн их биетэй
Өндийн зогсоно.
Мод
Нэг гараараа явах хүнийг үдэж,
Нөгөө гараараа үлдсэн хүнийг барина.
Мод явж чадахгүй учраас
Бүх хагацлыг харж зогсдог.
Тоо томшгүй олон удаа үдэж,
тоо томшгүй олон удаа тэвэрчээ.
Явахыг үдэж,
Үлдсэн уй гашууг тээх нь.
Энэ л модны
Насаараа хийсэн ажил юм.
Бүдүүн их бие нь
тэр он жилүүдийн зузаан юм.